OS CAPITANS ABELLA DE CORCUBIÓN E OS SEUS NAUFRAXIOS
Nunha entrega anterior informamos da orixe e das embarcacións mercantes do
veciño e armador de Corcubión Antonio Abella Balado. Con este novo artigo
queremos lembrar a tres dos seus fillos, que foron capitáns dos mares de Europa
e América. Dos 10 fillos que tiveron Antonio Abella e a súa dona Rosa Rodríguez
Santillana, tres comandaron barcos tanto da casa como de terceiros. Estamos a
falar de Vicente, Manuel e José Antonio
Abella Rodríguez. Amáis, outras dúas das súas fillas casaron con capitáns. Dolores
casou con Ramón Rivas González e Encarnación con Antonio García Canosa.
Vicente Antonio Abella Rodríguez , o fillo máis vello de Antonio e Rosa,
naceu en Corcubión en 1827, foi o primeiro compoñente da familia Abella que
acadou o titulo de piloto. Con 24 anos xa exercía de capitán do “Ancares”. Isto sabémolo por un documento
de protesta de mar outorgado en Corcubión polo novo capitán o 5 de novembro de
1851. Este bergantín saíra de Liverpool con destino a Barcelona con cargamento
de fardería y otros géneros pero, ao
pasar por Fisterra, tivo unha suposta vía de auga que lle obrigou a facer unha
arribada forzosa na súa vila natal. Dáse a circunstancia de que no buque ía
embarcado outro fillo do armador, Manuel. Segundo consta no documento exercía
como “agregado a piloto”, que viña a
significar piloto en prácticas. A este documento de protesta seguíronlle
outros, nos seguintes anos, nos que o capitán seguía a ser Vicente Abella, e o
inicio das súas travesías Liverpool, Londres ou La Habana. O punto de destino
era preferentemente Barcelona, aínda que hai constancia de viaxes a Matanzas,
na illa de Cuba, e varios portos do Reino Unido. Dende 1857 o capitán do
Ancares foi o veciño de Cee Antonio López Vaamonde. O capitán Vicente Abella, a
primeiros dos anos sesenta, logo de deixar o mando do “Ancares” comezou a comandar outra embarcación da casa armadora
familiar, o bergantín “Unión”.
O seguinte capitán da mercante desta
familia foi Manuel Antonio Abella Rodríguez, nado en Corcubión en 1835. Con
apenas 16 anos xa estaba navegando co seu irmán Vicente a bordo do bergantín “Ancares”, e con 21 xa comandaba outro
barco do seu pai, o bergantín “Sagitario”.
Por un documento de protesta, outorgado o 5 de abril de 1856 en Corcubión,
sabemos que Manuel Abella, ao mando deste bergantín, saíu da Habana con destino
a Hamburgo con cargamento de tabaco, azucre e mel. A este documento de protesta
seguíronlle outros capitaneando este buque nos anos seguintes, facendo viaxes
entre portos da illa de Cuba e do norte de Europa e o Mediterráneo. Cómpre
destacar que entre 1860 y 1864 fixo con
este barco varias viaxes a diferentes portos de Noruega para cargar bacallau e
levalo a Bilbao.
Bergantín Nueva Unión imaxe xentileza da familia Abella
Manuel e o bergantín “Sagitario” naufragaron en decembro de 1864
cando realizaban unha viaxe de Bilbao a La Habana cun cargamento de fariña,
tras loitar contra unhas duras condicións de mar e vento. O piloto no momento
do sinistro era o seu cuñado Ramón Rivas. Da declaración do capitán da fragata
francesa “Marie Elise”, Mr. Renier,
no expediente instruído polo seu naufraxio que se atopa no Arquivo da Mariña
“Alvaro de Bazán”, destacamos o seguinte:“El 22 de diciembre de 1864 a las
nueve de la mañana, estando por 33º 5´ latitud norte 23º 45´ longitud, apercibí
contra el viento a pequeña distancia un buque entre dos aguas en el más triste
estado, no teniendo más que su palo menor de trinquete, al cual se hallaban
agarrados algunos hombres que hacían señales angustiosas. Yo envié enseguida mi
bote para salvarlos y volvió con seis hombres: el capitán, el segundo, tres
marineros y un pasajero, que sobrevivieron únicamente de los doce que iban a bordo. Los otros seis habían sido
arrebatados por el mar”.
Unha vez a bordo do buque, foron colmados de atencións, e malia que o destino
do barco francés era Bos Aires o capitán desviou o seu rumbo cara o Senegal,
onde foron desembarcados. O armador do barco renunciou a calquera indemnización
pola manutención dos náufragos e polos demais gastos ocasionados polo desvío do
mesmo. Ao capitán, polo seu humanitario comportamento, por Real Orden de 15 de setembro
de 1866, foille concedida unha medalla de honra de ouro.
Manuel, malia a súa dramática experiencia, volveu ao mar pasados uns anos.
Sabémolo por outro documento de protesta, esta vez outorgado na cidade de Bilbao en 1868. Nel consta que exercía como capitán dun
bergantín chamado “Chomin”, da
matrícula de Bilbao, onde entrou con carga de bacallau tomada na cidade
norueguesa de Bergen.
O bergantín goleta “Nueva Unión”,
naufragou no ano 1873 na entrada de Santander, nuns baixos que se chaman as
Quebrantas, cando realizaba unha viaxe dende Corcubión a Santander. Era moi
frecuente ver este buque no porto de Santander, dende o que iniciaba viaxes a
Cuba e a diferentes portos do norte de Europa. Existe constancia documental
dunha estancia en Hamburgo, no mes de setembro de 1867, onde tiveron que
realizarlle diversas reparacións para poder seguir navegando tras sufrir un
forte temporal. O seu naufraxio, ocorrido a media tarde do 2 de novembro de
1873, tivo que causar un gran impacto tanto na contorna de Corcubión como na
propia vila de Santander, xa que á vista de moitos veciños morreron os oito
tripulantes do bergantín así como outros sete mariñeiros que acudiron no seu
auxilio. Entre os mariñeiros afogados estaba o veciño de Muros Antonio Lojo
Abella, fillo do mestre carpinteiro
Manuel Lojo e de María Abella, a súa vez filla de Antonio Abella e Rosa
Rodríguez, a armadora neses momentos do Nueva
Unión. Non sabemos quen era o capitán da embarcación no momento do
sinistro, xa que nada aparece ao
respecto nas crónicas da época e nos libros sacramentais de defuntos de
Corcubión e da súa contorna. Como mencionamos anteriormente, ata uns meses
antes fora José Antonio Abella Rodríguez, que no verán anterior ao sinistro
tivo que abandonar o seu barco por enfermidade, pero a este ségueselle a pista
a partir de 1876 como capitán doutro bergantín. Con 28 anos era o capitán do
bergantín de 253 toneladas “Luisa”,
da matrícula de Huelva, co que volveu a facer varias viaxes entre a península e
Cuba.
O naufraxio do bergantín “Nueva Unión”
trouxo dúas consecuencias: a primeira e máis inmediata, a desaparición da casa
armadora Abella de Corcubión. A segunda e máis importante foi que este
dramático suceso dou pe a creación en Santander da primeira asociación de
salvamento de náufragos no noso país de carácter voluntario e humanitario,
antecedente da Sociedade Española de Salvamento de Náufragos.
Sirvan estes artigos para lembrar a esta importante familia de armadores e
capitáns de Corcubión que se adicaron ao tráfico comercial entre diferentes
portos nacionais con outros do norte de Europa e América, facendo da súa vila
unha referencia na materia. Era frecuente ver naqueles tempos algún destes barcos
en portos de Noruega, como Haugesund, Aalesund, Cristiansund, ou Torshavn,
cargando bacallau para la península, ou en portos de Alemania e Inglaterra,
sobre todo Liverpool, , tomando ao seu bordo todo tipo de mercadorías, con destino
a Cuba. Ben podemos imaxinarnos un
fermoso veleiro, con todo o seu trapo despregado, levando orgulloso na súa popa
a palabra “CORCUBIÓN”.
En Corcubión e Esteiro a 21 de marzo de 2021
Aquiles Garea e Santiago Llovo.
Comentarios
Publicar un comentario